فيشارا الحصري

فيشارا الحصري يحدثكم من بلاد بهارا البعيدة قائلا:

أنا فيشارا،  ساكن في بهارا.

جيت في شيكارا، راكب حمارا

أبص من بعيد، بشوفكوا عبيد

أنا عنيد ومش هيفيد، اسمعوا يا عبيد

يا إما معايا، يا إما هزيد

أنا فشار، ليل ونهار

عايزكوا تهاتوا، تكونوا ثوار

أنا منفوش، على فشوش

بشك فيكوا، واحد واحد، في كل الناس

أنا محتاس، عايزها ثورة بكل حماس

وأنا مستكين، عمري ما روح، شمال ويمين

عايزها والعا، عايزها نار

هد جدار، إحرء في عمار

خد بنزين، أوعى تستكين

أنت يا غلبان، يا بن الغلبان

سيب الفاس، اهتف بحماس

عايز احتقان، إحساس غضبان

أنا أرفان من النظام، أي نظام

أنا غضبان، على طول غضبان

أنا امتعاض، أنا ظنان، على طول ظنان

أنا يساري، مش باختياري

عشت في عصر، كان اشتراكي

شفت الكل، كان بيحاكي

مشيت معاهم، لأكل العيش

عشان الكيف، وكمان الرغيف

بشرب شيشة، وكمان حشيش

والعمر أهو راح، على مفيش

ممكن اهادن ممكن أماين اخد تناتيش
آاعدين ليه كلكوا حرافيش
و فيشارا تاني دخل وآل

عايزها ثورة، من عالنت

ادخل سجل، عل الفيسبوك

خليك فاتح، أوعى تسوك

اشتم إلعن، خليك نيولوك

واديني آاعد، في بلاد بهارا

لحد يوم، ما تأوم له إياما

وتبأى خربت، وتبان علاما

أرجع بأى وابان على اصلي

ويأولوا عاش، فيشارا العصري

وفيشارا تالت، طب جديد

وآل أنا إوة، وكمان حديد

واللي مش عاجبه، يمشي بعيد

جاب أرقام من الأوهام وآل دي أكيد
شالولي الجزمة يوم العيد
ولبسهالي الواد عيد

ورايا شلة أنا مش إلا، أفوت في حديد

وفيشارا غيره آل أنا حزين

أنا بتكلم، باسم الدين

فجر فخخ، والله يعين

اعمل فتنة، خليها طين
احرء دمر كنيس القديسين

تموت في الآخر، وفيه حورعين

آاه يا بلادي، عندك كام فيشارا

من كل شارع، وفي كل حارا

ربنا يستر على كل مصري

وما يحكمش فيهم فيشارا الحصري

(نشأت النادي 1/1/2011م.)