حوار الطرشان

أنت بتتكلم ليه عن الوزارة
طب لما تتقفش وريني الشطارة
وابقى سد مع مخبر الإمارة
واصرخ جامد لما تدخل المغارة
عشان محدش هيهمس ولو بإشارة
عاملي فيها بطل وهتغير الوزارة
لا إنسى داحنا هنرفعك وهنسيبلك أمارة
ونوريك اللي عمرك ما شفته في روتانة
اشرب صعق وذل وضرب ومهانة
ياه عاملي فيها بطل وبتحب الأمانة
وتهيج وتجمهر علينا الناس الغلبانة
كان غيرك أشطر يا بن الشيطانه
بتصحي نفوس الناس الخربانة
وتصلح اللي اتكسر وترفع عنا الحصانه
وترجع وتزود لكل مؤمن إيمانه
وتكدر الأمن وتعرف الناس طريقة آذانا
يا بني اسكت هنخترعلك طريقة إدانة
ونعمل قانون ونفصله بسرعة كدا من حدانا
ونقفل قناة تعرف الناس فساد البطانة
ونجري ما نلحق نسد كل ثغرة بمتانة
والهتيفة تصقف وتهتف وترفع من شنانا
تمدح وتعدد على الناس كتير من شيمانا
يقع ضعاف النفوس ويدوبوا في هوانا
ونصدق نفسنا ونعيش حياتنا انفصاما
ونقول دول حاقدين ومش عارفين عدانا
ونقول عاشت اللي من خيرها بسطانا
وأدينا ماشيين ومش عارفين فين هترسي خطانا
والدنيا كل يوم بحال والكل حولينا هجانا
أهم شيء احنا قاعدين ومتمسكين بالحصانة
وابقى قابلني لو عرفت تبمبك معانا
في النهاية بالحوار أو بغيره هيفضل هنانا
أحسنلك سلم وعيش وكل عيش والنصيحة منا أمانة